《愛情中嘅敵人,從來都只是自己》

到底如何維持一段關係?關鍵係咩?呢個問題差唔多每一個客人都會問,尤其係單身咗一段時間嘅人,喺經歷過幾段失敗嘅感情之後,就更加明白兩個人能夠走在一起嗰份難能可貴。我哋已經過咗耳聽愛情嘅年紀,亦唔再追求轟轟烈烈嘅感覺,山盟海誓也不及柴米油鹽嚟得珍貴。

我諗,要維持一段關係,靠嘅唔會係單單一個「愛」字,而係「成本」。簡單來說,每當我哋付出咗就會有成本,同時亦產生相對嘅期望:付出愈多,期望愈大。試諗吓,當你同一個人相處咗三五年,每日住埋一齊,知道佢嘅喜好、習慣,飲咖啡加唔加糖,食嘢落唔落辣,鍾意睇咩類型嘅電影……同樣地,佢都會逐漸摸清你嘅喜好,以上所講嘅,好可能係用時間、心機、甚至爭吵磨合換返嚟,呢啲,就係一段關係嘅「成本」,aka「分手的代價」。

試吓問自己,若突然有一日,你遇到一個新嘅人,假設佢外在條件唔錯,佢亦被你深深吸引,對你展開熱烈追求,係不知不覺間你對佢心動了。但係,叫你放低過去,你能夠毫不猶豫、頭也不回地分手嗎?你敢嗎?

通常答案都係「不會」,或者「我會考慮下」。就算你再喜歡新對象,覺得喺佢身上搵到初戀嘅感覺,覺得心如鹿撞,覺得春天突然降臨,你腦海中總會有把聲音同你講:「你諗清楚呀,你要放低嘅唔單止係一個人,而係你哋用時間去經營嘅感情,用年月換返嚟嘅熟悉與安穩,去追隨一個唔確定嘅人。」

有研究指出,當感性與理性喺海交戰時,人會傾向理性,會利用數字去比較兩者。即係話,就算新舊對象你都一樣咁喜歡,大部分人都係選擇留係舊有關係當中。因為舊關係包含咗時間,責任,承諾,一啲量化到嘅情感,亦係自己掌握之中。

人類對未知嘅好恐懼可以有兩種效果:帶領我哋探索未知嘅領域,去消除恐懼感;或者留係既有嘅comfort zone,繼續過安穩嘅日子。要令到一段關係無「未知」嘅原素,就要以心待人,同時自我成長,令雙方差距不太大,咁隨住感情存在嘅時間愈長,雙方嘅成本亦會不斷增加,感情穩定嘅優勢自然愈來愈大。當到某個程度,就算一旦感情出現裂縫,雙方都承受唔到放棄呢段感情嘅風險與代價,反而對方係外面經歷得愈多,只會覺得「還是你最好」。

愛情中嘅敵人,從來都只係自己咋。

About Author

choco.editor